Annir hjá björgunarsveitum eystra vegna fannfergis

Björgunarsveitarmen og lögregla á Austfjörðum hafa staðið í ströngu í alla nótt við að aðstoða vegfarendur í vandræðum vegna fannfergis.

Meðal annars hefur þurft að aðstoða marga útlendinga af þeim 400 sem komu á 70 bílum með Norrænu til Seyðisfjaðrar í gær. Á Egilsstöðum snjóar enn og þar hefur fallið allt að 30 sentímetra djúpur snjór. Íbúðargötur eru ófærar fólksbílum en aðalgötur og bílastæði við fyrirtæki og stofnanir hafa verið rudd.

Vegagerðin er að ryðja helstu þjóðvegi  en óveður er á Mývatnsöræfum. Þá er beðið með mokstur á Möðrudalsöræfum vegna óveðurs. Í morgun var meðal annars ófært um Fjarðarheiði, Öxi og Hellisheiði eystri. Einn bíll hefur oltið og annar hafnað utan vegar en engan sakaði.