Vonast til að verðtrygginganefnd skili niðurstöðum í næsta mánuði

Vinnuhópur sem félagsmálaráðherra skipaði til þess að finna lausnir fyrir þá sem eru með verðtryggð lán skilar að öllum líkindum ekki niðurstöðum fyrr en um miðjan næsta mánuð. Vandasamt verk segir félagsmálaráðherra.

Jóhanna Sigurðardóttir félagsmálaráðherra kynnti vinnuhópinn til leiks á ársfundi ASÍ fyrri skömmu. Hópnum er falið að leita leiða til að koma til móts við þá íslendinga sem eru með verðtryggð lán á sínum herðum. Sá hópur tekur nú á sig mikinn skell með hækkandi verðbólgu.

Jóhanna segir að nefnd á vegum ráðuneytisins sé að störfum og hún hittist daglega til að skoða lausnir á málinu. „Ég vonast til þess að hún skili fljótlega en hver niðurstaðan verður veit ég ekki vegna þess að þettar er mjög vandasamt mál að taka á," segir Jóhanna.

Yfirvöld hafa þegar farið þess á leit við fjármálastofnanira að þeir sem skulda svokölluð myntkörfulán geti fryst þau en lítið hefur bólað á úrræðum fyrir alla hina. Að minnsta kosti er frysting verðtryggðra lána ekki í boði. Jóhanna leggur áherslu a að fólk sem geti borgað af lánum sínum geri það.

Ráðherra bendir hins vegar á að ýmis úrræði séu í boði fyrir þá sem ekki geta staðið í skilum. En eiga þeir sem skulda í íslenskum krónum ekki að sitja við sama borð og þeir sem skulda í erlendum myntum? „Auðvitað er hægt að segja það sem slíkt en þetta er bara ekki einfalt. Það eru náttúrlega lánardrottnar þarna á móti, í verðtryggingunni. Hverjir eiga þessi lán? Þetta eru mikið lífeyrissjóðirnir svo ég nefni sem dæmi. En við erum að skoða allar leiðir í þessu efni. Það er eina sem ég get sagt við fólk á þessari stundu. Þetta er mjög vandmeðfarið og menn eru bara að velta hverjum steini," segir Jóhanna. Aðspurð vonast hún til að nefndin skili niðurstöðu um miðjan næsta mánuð.