Flokksfélagar Browns hvetja hann til þess að segja af sér

Útlit er fyrir að verulega sé farið að síga á síðari hlutann í forsætisráðherratíð Gordons Brown því nú eru bæði þingmenn hans og ráðherrar farnir að hvetja hann til að segja af sér - eða jafnvel að setja hann af.

Þessar umræður fengu byr undir báða vængi í gær eftir að Verkamannaflokkurinn tapaði þingsæti í Glasgow - þingsæti sem hann hefur haldið allt frá stofnun. Nær öll bresku blöðin birta í dag forsíðufréttir þar sem vitnað er í ónefnda ráðherra sem segja að þeir séu undir miklum þrýstingi almennra þingmanna um að sparka Brown.

Vinsældir Browns hafa dvínað jafnt og þétt síðan hann tók við embætti af Tony Blair í júní í fyrra. Nú sýna nýjustu skoðanakannanir að Verkamannaflokkurinn hafi aðeins fjórðungs fylgi meðal kjósenda á meðan Íhaldsmenn hafa 46% fylgi. Þingkosningar í Bretlandi þarf að halda eigi síðar en 2010.

Ráðherrar í stjórn Browns munu almennt vera andvígir því að sparka honum nú þegar - en sumir þeirra segja að útlit sé fyrir að lagt verði að honum að víkja fyrir landsfund Verkamannaflokksins sem hefst 20. september. Og þeim virðist bera saman um að niðurlægingin í Glasgow fyrir helgina hafi verið kornið sem fyllti mælinn. Stemningin er að breytast, hafði blaðið Independent eftir ónefndum ráðherra. Andstaðan er að harðna.

Líklegasti eftirmaður Browns er í augnablikinu talinn vera utanríkisráðherrann, David Miliband, sem er ungur og myndarlegur og kemur vel fyrir í fjölmiðlum.