Dópið falið í fölsku lofti

Hluti dópsins sem Hollendingur reyndi að smygla til landsins með Norrænu var falið í fölsku lofti í húsbílnum. Þetta kemur fram í Austurglugganum í dag.

Austurglugginn hefur þetta eftir heimildarmanni í fíkniefnaheiminum en heimildar Vísis benda einnig til þess að þetta sé rétt. Vandað falskt loft var smíðað í húsbílinn auk þess sem sérsmíðaðir felustaðir voru hannaðir í innréttingu bílsins.

Hörður Jóhannesson, sem sér um samskipti við fjölmiðla vegna málsins, hefur ekki viljað staðfesta að dópið hafi fundist í lofti bílsins.

Hollendingurinn var eftirlýstur á Schengen svæðinu. Samtals reyndi hann að smygla tæpum 200 kílóum af hassi til landsins auk kókaíns og maríújana. Fíkniefnasalinn sem Austurglugginn ræðir við segir handtöku Hollendingsins ekki hafa áhrif á skipulagðan fíkniefnaheim Íslands.

"Eftir stendur slatti af hassi og eitt sjötugt burðardýr og að þeir hafa hvorki náð íslenskum eiturlyfjasölum né neinum úr mafíunni. Skipulagið er ólaskað," hefur Austurglugginn eftir heimildarmanni sínum.