Hanna Birna verður oddviti Sjálfstæðismanna í Reykjavík

Hanna Birna Kristjánsdóttir verður oddviti borgarstjórnarflokks Sjálfstæðisflokksins það sem eftir lifir af kjörtímabilinu. Þetta var ákveðið á fundi borgarfulltrúa flokksins í dag. Vilhjálmur Þ. Vilhjálmsson, fráfarandi oddviti, lagði þessa tillögu fram. Ekki hefur náðst í neinn af borgarfulltrúunum.

 

Vilhjálmur verður áfram borgarfulltrúi út kjörtímabilið en allt bendir til þess að Hanna Birna setjist í stól borgarstjóra í mars á næsta ári þegar Ólafur F. Magnússon hættir.

Eins og Vísir greindi frá í vikunni hefur Vilhjálmur reynt að finna eftirmann sinn í nokkrar vikur en það hefur ekki gengið vegna ágreinings á milli Hönnu Birnu, Gísla Marteins Baldurssonar og Júlíusar Vífils Ingvarssonar sem öll hafa viljað oddvitastöðuna. Ljóst er að Vilhjálmi hefur með þessu tekist að leysa þann ágreining.