Hollvinir Hallargarðsins funda á morgun

Á morgun verður haldinn framhaldsstofnfundur Hollvina Hallargarðsins en á fundi í Hallargarðinum 20. apríl sl. ákváðu um 150 fundarmenn að stofna til samtaka til að tryggja að Hallargarðurinn verði ekki skertur og verði áfram fyrir almenning. Stofnaður var sérstakur undirbúningshópur, sem nú boðar til framhaldsstofnfundar. Þetta segir í fréttatilkynningu frá samtökunum.

Framhaldsstofnfundurinn verður í húsnæði Reykjavíkurakademíunnar í JL-húsinu, Hringbraut 121, kl. 20.

Á dagskrá eru samþykktir Hollvina Hallargarðsins og verkefnin fram undan. Þorgrímur Gestsson blaðamaður og rithöfundur fh. undirbúningshópsins stýrir þeirri umræðu. Þá fer fram stjórnarkjör en að því loknu ræðir Samson Bjarnar Harðarson, landslagsarkitekt og lektor við Landbúnaðarháskóla Íslands, um Hallargarðinn fyrr og nú. Að því loknu fer fram kynning á samningi Reykjavíkurborgar og Novators um Fríkirkjuveg 11 og þeim breytingum sem hann hefur í för með sér í Hallargarðinum. Stjórnar Þorleifur Gunnlaugsson borgarfulltrúi þeirri umræðu.

Fundurinn er öllum opinn. Vakin er athygli á því að enda þótt borgarráð hafi samþykkt kaupsamning við Novator á borgarstjórn síðasta orðið þar sem samningurinn þarf staðfestingu meirihluta borgarfulltrúa.