Kastaði sér út úr bíl áður en hann fór niður gil

Ökumaður bifreiðar náði að kasta sér út úr henni áður en hún fór tugi metra niður snarbratt gil við Vatnsdalsveg norðan Tungu á sunnudag. Fram kemur í dagbók lögreglunnar á Hvolsvelli að maðurinn hafi ekki meiðst en bifreiðin mun eitthvað hafa skemmst.

Þá segir í dagbókinni að lögregla hafi í liðinni viku tvisvar þurft að kalla björgunarsveitir til aðstoðar ferðamönnum á Landmannaleið og Lakavegi eftir að ökumenn höfðu fest bifreiðar sínar í ám á þeim leiðum. Í báðum tilfellum tókst að bjarga bæði fólki og bifreiðum. Lögregla segir fulla ástæðu til að minna fólk á að fara með gát þar sem miklir vatnavextir hafa verið í öllum ám og lækjum síðustu daga á hálendinu.