Ekki góður bragur á því að hafa reykherbergi á þingi

Árni Þór Sigurðsson, þingmaður Vinstri - grænna, vakti athygli á þeirri deilu sem uppi hefur verið um reykingar á veitingastöðum. Vísaði hann til þess að kráareigendur hefðu mótmælt því að mega ekki hafa reykherbergi með því að heimila reykingar á stöðum sínum á dögunum. Þetta mál vekti upp spurningar um reykingabann og baráttuna við reykingar í samfélaginu.

Dregið hefði úr reykingum undanfarin ár eftir þrotlausa forvarnavinnu. Samfélagslegar afleiðingar reykinga væru alvarlegar og kostnaður þjóðarbúsins vegna þess árið 2003 hefði verið 20 milljarðar á verðlagi ársins 2000. Tóbaksvarnir væru stórt heilbrigðismál og lýðheilsumál og spurði hann ráðherra hvort hann hygðist standa vörð um tóbaksvarnarlögin.

Heilbrigðisráðherra sagði að menn ættu þó að byrja að taka til heima hjá sér. Vísaði Guðlaugur til þess að reykherbergi væri fyrir starfsmenn Alþingis. Sagði hann ekki góðan brag á því að Alþingi, sem samþykkt hefði tóbaksvarnarlögin, byði upp á slíkt. Sagðist hann hafa fengið fjöldan allan af athugasemdum frá fólki vegna þessa. Lagði hann til að þingmenn gengju í það að losa sig við reykherbergi.