Björgunarsveitir kallaðar út - Reykjanesbraut lokuð

Vegurinn undir Hafnarfjalli er nú lokaður vegna þess hve færðin er slæm en það á við víða á landinu. Lögreglan á Akranesi segir í tilkynningu að ekkert ferðaveður sé nú á Vesturlandsvegi og vegunum kring um Akrakfjall.

Mikill snjór er á vegum og blint og við bætist að að þar eru margir bílar fastir. Lögregla og björgunarsveitir bæði frá Akranesi og úr Borgarnesi vinna að því að aðstoða fólk sem er fast í bílum sínum og að koma föstum bílum út fyrir veg þannig að hægt verði að ryðja.

Fram kemur í tilkynningu Vegagerðarinnar að búið sé að loka veginum um Hellisheiði og Þrengsli. Þá segir í tilkynningu frá Umferðarstofu að Reykjanesbrautin sé nú ófær og eru lögreglumenn og björgunarsveitarmenn að aðstoða fjölda ökumanna sem sitja fastir í bílum sínum á veginum. Biður lögregla fólk að leggja ekki á Reykjanesbrautina.

Þæfingsfærð og snjókoma er víðast hvar á Suðurlandi og stendur mokstur yfir. Þæfingsfærð er á Holtavörðuheiði sama má segja um Snæfellsnes. Stórhríð er þar og ekkert ferðaveður.

Á Vestfjörðum er snjóþekja á flestum leiðum þó er þæfingsfærð á fjallvegum og þungfært yfir Steingrímsfjarðarheiði, mokstur stendur yfir.

Á Norðurlandi er ýmist hálka eða snjóþekja og sumstaðar einhver él eða

skafrenningur. Þæfingsfærði er á Víkurskarði.

Á Norðaustur- og Austurlandi er ófært á Möðrudalsöræfum, Vopnafjarðarheiði og Fjarðarheiði. Flughálka er í kringum Egilstaði. Snjóþekja og hálka er á öðrum leiðum. Breiðdalsheiði og Öxi eru lokaðar.