Mbeki: Viðræður halda áfram í Zimbabwe

Forseti Suður Afríku, Thabo Mbeki, sagði fyrr í dag að viðræður á milli Roberts Mugabe og hans manna og stjórnarandstöðuflokksins MDC í Zimbabwe myndu halda áfram til þess að leysa stjórnmálavandann sem nú ríkir í landinu.

„Þessar viðræður á meðal ráðamanna í Zimbabwe halda áfram," sagði Mbeki í dag en hann hefur tekið að sér að miðla málum á milli Roberts Mugabe forseta Zimbabwe og forystumanna stjórnarandstöðu flokksins MDC.

Mjög eldfimt ástand hefur verið í Zimbabwe undanfarið á milli Mugabe og Morgans Tsvangirai oddvita MDC.

Kröfur Tsvangirai og hans manna eru að stjórnvöld láti af ofbeldi gegn stjórnarandstæðingum, að stjórnarandstæðingar verði látnir lausir úr fangelsum, að alþjóðlegt hjálparstarf í landinu hefjist á ný, að Afríkusambandið hafi fastafulltrúa í landinu og að þing verði kallað saman. Krafa Mugabes er hinsvegar aðeins ein: að hann verði viðurkenndur sem réttkjörinn forseti.