Sex leikarar túlkuðu Dylan

Dylan hefur verið heilmikið í sviðsjósinu undanfarið ár. Í ársbyrjun sýndi Græna ljósið nýja kvikmynd, I'M NOT THERE, um lífshlaup Dylan eftir Todd Haynes þar sem mismunandi æviskeið hans eru túlkuð af sex mismunandi leikurum, þar á meðal Cate Blanchett, Christian Bale, Heath Ledger og Richard Gere. Myndin fór mikla sigurgöngu um heiminn og var tilnefnd til Óskarsverðlauna auk Golden Globe, BAFTA og fjölda annarra verðlauna. Árið 2005 gerði Martin Scorsese magnaða heimildarmynd, NO DIRECTION HOME: BOB DYLAN, þar sem fókuserað er á árin 1961-1966, tímabil þar sem Dylan verður að þroskuðum söngvara, skáldi, flytjanda...og stjörnu. Sama ár kom svo út fyrsta bindi ævisögu hans; CHRONICLES: VOLUME ONE. Árið 2007 kom svo út safnplatan DYLAN sem í sinni einföldustu mynd inniheldur 18 af hans þekktustu lögum, en einnig er fáanleg 3ja diska útgáfu af plötunni með yfir 50 lögum.