Tvö leyniherbergi til viðbótar fundin í Jersey

Tvö refsingarherbergi hafa fundist á upptökuheimili í Jersey til viðbótar við þau tvö sem fundust við rannsókn lögreglu í febrúar. Réttarrannsóknarmenn fundu leyniherbergin á heimilinu sem nefnist Haut de la Garenne á Ermasundseynni.

Um 100 manns halda því fram að þeir hafi verið líkamlega og kynferðislega misnotaðir á heimilinu frá sjöunda áratugnum.

Við rannsókn á fyrri herbergjunum tveimur fannst baðkar og í því leifar af mannablóði ásamt skilaboðunum „Ég hef verið slæmur svo árum skiptir" sem voru rituð á vegg. Þar fannst einnig leynihurð og hlekkir. Húsið gekk undir heitinu Hryllingshúsið eftir að hauskúpa og bein barns fundust í húsinu 23. febrúar síðastliðinn.

Gordon Claude Wateride er sá eini sem hefur verið ákærður í tengslum við rannsóknina. Hann er sakaður um að hafa misnotað stúlkur undir 16 ára aldri frá árunum 1969 og 1979. Talið er að rúmlega 40 manns liggi undir grun.