Réðst á starfsmann veitingastaðar og braut einnig rúðu

Tvær líkamsárásir voru kærðar til lögreglunnar í Vestmannaeyjum eftir skemmtanahald um síðustu helgi.

Báðar áttu þær sér stað á veitingastaðnum Drífanda aðfaranótt 15. mars. Í öðru tilvikinu hafði einn af gestum staðarins orðið eitthvað ósáttur við einn af stafsmönnum staðarins og sló hann í andlitið. Lét hann ekki staðar numið heldur braut einnig rúðu í útidyrahurð staðarins eftir að honum hafði verið vísað út. Starfsmaðurinn er ekki alvarlega slasaður.

Í hinu tilvikinu hafði einn af gestum staðarins ráðist á annan gest með þeim afleiðingum að sá síðarnefndi hlaut skurð fyrir neðan vinstra auga. Þurfti sá sem ráðist var að að leita sér lækninga á Heilbrigðisstofnuninni í Eyjum en sauma þurfti nokkur spor í andlit mannsins til að loka sárinu.