Vilja skoða það að endurvekja Þjóðhagsstofnun

Tveir þingmenn Samfylkingarinnar vilja skoða það að Þjóðhagsstofnun verði endurvakin sem rannsóknarstofnun í efnahagsmálum. Þetta kom fram í umræðum á Alþingi í dag. Þeir eru ósammála tveimur þingmönnum Sjálfstæðisflokksins um að hverfa frá verðbólgumarkmiðum Seðlabankans.

Sigfús Karlsson, varaþingmaður Framsóknarflokksins, kvaddi sér hljóðs um störf þingsins og vísaði til greina sem sjálfstæðismennirnir Bjarni Benediktsson og Illugi Gunnarsson skrifuðu um efnahagsmál og birt var í Morgunblaðinu í gær. Þar lýstu þeir áhyggjum af stöðu efnhagslífsins og fjármálamarkaðarins.

Sagðist Sigfús deila áhyggjum með þingmönnunum tveimur en hann gæti þó ekki verið sammála öllum þeim aðgerðum sem þeir legðu til. Þar á meðal væri sú hugmynd að flytja almennan hluta Íbúðalánasjóðs út á markaðinn. Vísaði hann til fréttar Stöðvar 2 í gær um að bankar væru tregir til að lána til íbúðakaupa og einn þeirra hefði vísað á Íbúðalánasjóð. Spurði hann Bjarna Benediktsson hvort það væri stefna ríkisstjórnarinnar að breyta sjóðnum eins og lýst væri í greininni.

Vísbendingar um að íbúðalánakerfið standist ekki EES-ákvæði

Bjarni benti á að flokksbróðir Sigfúsar hefði í tíð sinni sem félagsmálaráðherra verið að vinna að breytingum á sjóðnum. Þær hefðu falist í því að færa verkefni á hinn almennan markað. Hins vegar hefði verið talað um að finna félagslegu hlutverki sjóðsins farveg. Þá benti hann á að sterkar vísbendingar væru um að íbúðalánakerfið stæðist ekki ákvæði EES-samningsins og því gæti sú staða komið brátt upp að menn yrðu þvigaðir til að skoða málið. Það væri jafnframt liður í því að skapa fjármálamarkaði góð skilyrði hér á markað.

Árni Páll Árnason, þingmaður Samfylkingarinnar, sagðist sammála greinarhöfundum um að koma ætti á auknu samráði og rannsóknum í efnahagsmálum. Menn fyndu fyrir því að það vantaði stofnun í ætt við Þjóðhagsstofnun. Kallaði hann eftir fordómalausri umræðu um efnahagsmál. Hins vegar yrðu menn að halda í verðbólgumarkmið Seðlabankans og óvarlegt væri að breyta viðmiðum þar um eins og Bjarni og Illugi hefðu lagt til.

Í svipaðan streng tók Ágúst Ólafur Ágústsson, varaformaður Samfylkingarinnar, og sagði að fara yrði varlega í það yfirgefa verðbólgumarkmið Seðlabankans. Með því að ná niður verðbólgu mætti ná stöðugleika. Þá sagði hann að mikil þensla hefði verið í efnahagslífinu sem væri að einhverju leyti enn í gangi. Þá taldi hann að hverfa ætti til fyrri tíma og efndurvekja Þjóðhagsstofnun.

Las Litlu gulu hænuna í gær

Bæði Steingrímur J. Sigfússon og Guðni Ágústsson, formenn Vinstri grænna og Framsóknarflokksins, sögðu gott að einhverjir úr stjórnarliðinu hefðu vaknað og áttað sig á ástandinu.

Minnti Steingrímur á að vinstri - græn hefðu í þrígang lagt fram þingsályktunartillögu um aðgerðir til að koma á stöðugleika í efnahagsmálum. Þar væru tillögur sem finna mætti í grein Bjarna og Illuga. Sagðist hann vonast til þess að tvímenningarnir gætu vakið stjórnarflokkanna í málinu. Þá andmælti hann því harðlega að leggja ætti niður Íbúðalánasjóð í núverandi mynd og benti á að yfirgnæfandi stuðningur væri við sjóðinn hjá fasteignasölum.

Guðni sagðist hafa verið að lesa Litlu gulu hænuna í gær og vísað til þess að svínið, hundurinn og kötturinn hefðu ekki viljað baka brauðið en það þyrfti að gera það. Sama ætti við um ástandið í efnahagsmálum, menn yrðu að horfast í augu við það. Sagði hann að ekki væri lengur samstaða um það í stjórnarflokkunum að gera ekki neitt og þakkaði guði fyrir að tveir stjórnarþingmenn af 43 hefðu opnað augun og tækju undir með framsóknarmönnum.