Enn fást engin svör um flótta Annþórs

Enn bólar ekkert á svörum við því hvað fór úrskeiðis þegar Annþór Kristján Karlsson flúði úr haldi lögreglunnar á höfuðborgarsvæðinu síðasta föstudag.

Stefán Eiríksson lögreglustjóri á höfuðborgarsvæðinu sagði í samtali við Vísi í morgun að málið væri enn í rannsókn og að enginn svör yrðu gefin fyrr en allt verði komið upp á borð.

Stefán vildi ekki svara því hvenær rannsókninni lyki.

Annþór átti að vera í einangrun þegar hann slapp úr gæslu lögreglunnar á höfuðborgarsvæðinu. Á lögreglustöðinni við Hverfisgötu var hann engu að síður vistaður í "opinni gæslu" eins og Geir Jón Þórisson orðaði það í Fréttablaðinu um helgina. Til marks um það var hurð inn í klefa Annþórs til dæmis höfð ólæst. Því komst Annþór auðveldlega inn í kompu á ganginum þar sem hann var vistaður til þess að sækja sér reipi sem hann notaði svo til þess að auðvelda sér flóttann út um rúðu sem hann braut.