Fundur ráðherra og bankastjóra ekki krísufundur

Fundur ráðherra og fulltrúa úr íslensku fjármálalífi í Ráðherrabústaðnum í dag var ekki krísufundur að sögn forsvarsmanna ríkisstjórnarinnar. Fundinum lauk fyrir stundu og sögðu þau Ingibjörg Sólrún Gísladóttir utanríksiráðherra og Geir H. Haarde forsætisráðherra að hann hefði verið gagnlegur.

Ákveðið hefði verið að kallað fulltrúa fjármálalífsins á fund til þess að fá upplýsingar um stöðu bankanna og fjármálalífsins og óska eftir tillögum að ráðstöfunum til þess að draga úr hugsanlegum áhrifum alþjóðlegrar lánsfjárkreppu hér á landi. Sögðu bæði Geir og Ingibjörg að mikilvægt væri að ríkisstjórnin og fjármálalífið ynnu saman í málinu.

Auk forsætisráðherra og utanríkisráðherra sátu fjármálaráðherra og viðskiptaráðherra fundinn með forsvarsmönnum fjármálalífsins. Viðurkenndu ráðherrarnir að staðan á fjármálmörkuðum væri nokkuð óstöðug en Geir H. Haarde sagði engin töfraorð til að leysa málin.

Ingibjörg Sólrún sagði enn fremur að alvanalegt væri að forystumenn ríkisstjórnarinanr funduðu með fulltrúum úr atvinnulífinu. Þannig hefði verið fundað með fulltrúum úr sjávarútvegi þegar horfur væru lakari en áður og svo væri einnig nú.

Aðspurður sagði forsætisráðherra að árangur fundarins væri ekki mælanlegur í krónum og aurum en hann hefði verið afskaplega gagnlegur.

Fundað með ASÍ á sama stað á morgun

Ráðherrarnir voru spurðir hvort til stæði að kynna íslenskt fjármálalíf sérstaklega vegna þeirrar stöðu sem uppi er á alþjóðamörkuðum. Svaraði Ingibjörg Sólrún því til ekki að væri ætlunin að fara í túr um heiminn en ríkisstjórnin myndi gera það sem í hennar valdi stæði til þess að leiðrétta rangfærslur um íslenskt efnahagslíf. Slíkar rangfærslur hefðu verið settar fram og við því þyrfti að bregðast.

Forsætisráðherra og utanríkisráðherra voru einnig spurð um kjarasamninga en fram hefur komið að meginlínur séu farnar að skýrast þar. Ráðherrarnir reiknuðu með að funda með forsvarsmönnum ASÍ á sama stað, það er í Ráðherrabústaðnum, á morgun þar sem farið yrði yfir tillögur ASÍ um aðkomu ríkisstjórnarinnar að kjarasamningum.

Ráðherrarnir tveir voru spurðir út í þá ákvörðun Seðlabankans að lækka ekki stýrivexti og vildu þeir lítið tjá sig um það. Þó kom fram í máli þeirra að mikilvægt væri að ákvörðun bankans lægi fyrir nú þegar kjarasamningar stæðu yfir. Þetta héngi allt saman.