Vilhjálmur hættir ekki sem borgarfulltrúi

Vilhjálmur Þ. Vilhjálmsson, oddviti sjálfstæðismanna í Reykjavíkurborg, sagði á blaðamannafundi í Valhöll í dag að hann hygðist ekki hætta sem borgarfulltrúi en að hann myndi meta stöðu sína á næstunni varðandi það hvort hann tæki við borgarstjórnarstólnum.

Blaðamannafundurinn var haldinn í kjölfar fundar borgarfulltrúa Sjálfstæðisflokksins. Hann hófst klukkan hálfeitt og stóð til um það bil tvö en athygli vakti að Vilhjálmur var einn á blaðamannafundinum.

Leitt að hafa lent í þessu máli

Vilhjálmur sagði borgarfulltrúana hafa farið yfir málið í heild sinni og hvernig það hefði þróast. Hann sagðist skilja megna óánægju í málinu og sjálfstæðismenn gerðu sér grein fyrir að þeir bæru þar sök.

Vilhjálmur sagði að hann teldi sig hafa axlað sína ábyrgð þegar sjálfstæðismenn hefðu misst meirihlutann í október. Hann hefði auk þess lagt sig allan fram um að draga allt upp á borð. Honum þætti persónulega mjög leitt að hafa lent í þessu máli. Hann sagðist þó ekki myndu hætta sem borgarfulltrúi.

Vilhjálmur var spurður út í framgöngu sína í Kastljósinu á fimmtudag. Þá sagðist hann hafa talað við borgarlögmann um málefni REI og Geysis Green Energy en daginn eftir sendi hann frá sér yfirlýsingu og sagðist hafa átt við fyrrverandi borgarlögmann, það er Hjörleif Kvaran, forstjóra Orkuveitunnar. Vilhjálmur viðurkenndi að þetta hefði verið klaufalegt og sagði: „Ég er bara manneskja sem hefur gert mistök," sagði Vilhjálmur. Hann hefði alltaf unnið fyrir Reykjavíkurborg með hagsmuni borgarinnar í huga.

Hafði umboð til að samþykkja samning

Þá sagði Vilhjálmur að það væri alveg á tæru að hann hefði haft umboð til þess að samþykkja samruna REI og Geysis Green Energy en hann væri sammála því sem fram kæmi í skýrslu stýrihópsins um að það þyrfti að skýra betur stöðuumboð borgarstjóra. Vilhjálmur viðurkenndi að hann hefði átt að tala við núverandi borgarlögmann en það hefði aldrei verið í umræðunni í október að hann hefði ekki umboð til að samþykkja samninginn.

Aðspurður hvort borgarfulltrúar Sjálfstæðisflokksins hefðu lýst yfir stuðningi við hann sagði Vilhjálmur svo vera. Það væri mikil sátt hjá þeim og enginn hefði skorað á hann að draga sig í hlé. Hann þyrfti hins vegar tíma til að skoða sín mál.

Gerir ráð fyrir að þetta sé hans síðasta kjörtímabil

Aðspurður hvort hann hygðist bjóða sig aftur fram í næstu borgarstjórnarkosningum, sem verða eftir rúm tvö ár, sagði Vilhjálmur að hann gerði ráð fyrir að þetta yrði hans síðasta kjörtímabil.

Vilhjálmur sagðist hafa ráðfært sig við Geir H. Haarde, formann Sjálfstæðisflokksins í málinu. Þeir hefðu ræðst saman um helgina og í morgun.

Vilhjálmur var þráspurður um það hvort hann hygðist stíga til hliðar sem borgarstjóraefni flokksins en hann vildi ekki tjá sig um það. „Það er ekki stóra málið hvort mín persóna verði borgarstjóri eða ekki," sagði Vilhjálmur. Hann hefði verið borgarfulltrúi í 25 ár og ætlaði að vinna sér traust borgarbúa.

Vilhjálmur sagði nýjan meirihluta ekki í hættu og gagnrýndi að aðrir hefðu ekki axlað ábyrgð í málinu. Benti hann á að Sigrún Elsa Smáradóttir, fulltrúi Samfylkingarinnar á stjórnarfundi Orkuveitunnar, hefði ekki gert athugasemdir við sameininguna. Enn fremur sagði hann að Orkuveita Reykjavíkur hefði ekki skaðast á málinu.