Fordæmdu pyntingar Bandaríkjamanna

Þingmenn allra flokka fordæmdu í dag pyntingar Bandaríkjamanna í Guantanamo-búðunum og farið var fram á að tillaga Vinstri - grænna um yfirlýsingar frá Alþingi þessa efnis yrði hraðað í gegnum þingið.

Steingrímur J. Sigfússon, þingmaður Vinstri - grænna, kvaddi sér hljóðs undir liðnum störf þingsins og benti á að yfirmenn CIA hefðu viðurkennt að hafa beitt fanga svokölluðum vatnspyntingum. Minnti hann á að CIA hefði eytt sönnunargögnum yfir um óhefðbundnar yfirheyrsluaðferðir á föngum.

Benti hann á að í utanríkismálanefnd biði tillaga um að Alþingi fordæmdi mannréttindabrot Bandaríkjamanna og hvetti Bandaríkjamenn til að loka búðunum í Guantanamo. Beindi hann orðum sínum til formanns og varaformanns utanríkismálanefndar og utanríkisráðherra og sagði það myndarbrag að Alþingi ræki af sér slyðruorðið þar sem þessu athæfi væri mótmælt og hvatt yrði til þess að loka Guantanamo-búðunum.

Full ástæða til að flýta vinnu við tillögu Vg

Árni Páll Árnason, varaformaður utanríkismálanefndar, sagði sorglegt að Bandaríkjamenn hefðu með rekstri búðanna í Guantamo skorist úr leik lýðræðisþjóða. Taldi hann mikilvægt að Alþingi álykaði um stöðu mála í Guantanamo. Benti hann á að þegar tillaga Vinstri - grænna hefði verið rædd á þingi hefði verið um hana samstaða og hann teldi fulla ástæðu til að flýta vinnu við hana í utanríkismálanefnd. Það yrðu að koma skýr skilaboð um að Alþingi liði ekki vinnubrögðin í Guantanamo.

Ragnheiður Elín Árnadóttir, þingmaður Sjálfstæðisflokksins, sagði mannréttindi hafa verið höfð í öndvegi hjá íslenskum stjórnvöldum og Íslendingar fordæmdu allar pyntingar hefðu þær átt sér stað. Baráttan gegn alþjóðlegum hryðjuverkum yrði að fara eftir alþjóðlegum reglum. Sagðist hún gera ráð fyrir að tillaga Vg færi sína leið en ítrekaði að íslensk stjórnvöld settu mannréttindi í öndvegi og hvettu alla til að virða þau.

Jón Magnússon, þingmaður Frjálslynda flokksins, sagðist ánægður með að talsmenn allra floka væru óánægðir með þau mannréttindabrot sem fram færu í Guantanmo-búðunum. Með því að fordæma búðirnar væri verið taka undir með alþjóðalsamtökum lögmanna um að alþjóðasamningar væru brotnir og fangabúðirnar reknar án dóms og laga. Sagði hann að afgreiða yrði tillögu Vg sem allra fyrst.

Höskuldur Þórhallsson, þingmaður Framsóknarflokksins, sagði ekkert réttlæta að mönnum væri haldið án dóms og laga í Guantanamo. Íslendingar væru ekki fjölmennir en rödd þeirra væri sterk og íslensk stjórnvöld ættu að beita sér fyrir því á alþjóðavettvangi að búðunum yrði lokað.