Klefafélagar á Litla Hrauni gera þarfir sínar fyrir framan hvorn annan

Vísir greindi frá óánægju fanga í morgun sem snýr að því að tveir fangar séu vistaðir í sama klefa. Fangelsismálayfirvöld segja vandann tímabundinn því von sá á að tíu fangaklefar á Akureyri bætist við innan skamms.

Afstaða félags fanga segir hinsvegar engu skipta hvort ástandið sé tímabundið eður ei. Aðstæðurnar séu skelfilegar þar sem t.d eitt sóðalegt klósett sé í fyrrnefndum tveggja manna klefum. Yfirlýsingu frá félaginu má lesa hér að neðan.

„AFSTAÐA félag fanga tekur undir það með fangelsismálastjóra að starfsfólk á Litla-Hrauni er almennt til fyrirmyndar og hefur yfir mikilli fagþekkingu og kunnáttu að ráða. Það breytir því þó ekki að aðstæður sem föngum er nú boðið upp á Litla-Hrauni og í Kópavogi, eftir því sem fregnir þaðan herma, eru skelfilegar. Þó skiptir engu máli hvort þær eru tímabundnar eður ei. Í þeim klefum þar sem tveir fangar eru vistaðir saman á Litla-Hrauni er eitt sóðalegt klósett, án setu, boltað í vegg, þar sem annar gerir þarfir sínar fyrir augum hins. Þar er einnig fata sem gegnir hlutverki vasks, eins konar vaskafata.

AFSTAÐA sér ekki að ástandið batni að ráði með 10 fangaklefum á Akureyri. Það eru langir biðlistar eftir fangelsisplássum og þeir gera lítið annað en að lengjast. Dómar virðast vera að þyngjast og afbrotum að fjölga. Við þessu virðumst við Íslendingar einfaldlega engin ráð hafa. Saga byggingar nýs fangelsis er orðin tveggja áratuga gömul og vilji er ekki fyrir því að leggja til nauðsynlegt fé til fangelsismála.

AFSTAÐA vill hrósa fangelsisyfirvöldum fyrir það sem þó hefur áunnist á undanförnum árum, þrátt fyrir fjárskort en hvetur þó til þess að þau úrræði sem möguleg eru verði nýtt. Langstærstur hluti íslenskra fanga er læstur inni í öryggisfangelsum og nú eru þeir farnir að hrannast upp. Þessu þarf einfaldlega að breyta, annað hvort með því að auka við pláss eða að fækka föngum. Annað er ekki í boði.

Eitt sinn var fangelsum lokað, að hluta, til á sumrin til að spara. Nú er það útilokað. Fangavist varir lengur nú en áður og sífellt fjölgar föngum. Eftir því sem aðstæður verða erfiðari og svigrúm í fangavistinni minni aukast líkur á nýjum afbrotum og endurkomu í fangelsi. Þetta er sú staðreynd sem blasir við Íslendingum í dag. Íslendingar hafa um tvennt að velja; að sætta sig við ástandið í fangelsum og þá um leið þá fanga sem skila sér út á götu eða að spyrna við fæti og snúa þróuninni við. Til þess eru færar leiðir."

Sjá einnig:

Segja Fangelsið á Litla-Hrauni yfirfullt

Timabundi ráðstöfun á vista fanga saman í klefa