Um tuttugu sagt upp því Samherji hættir rækjuvinnslu á Akureyri

Rúmlega 20 manns verður sagt upp hjá Samherja í kjölfar þeirrar ákvörðunar fyrirtækisins að hætta rækjuvinnslu á Akureyri. Fram kemur í tilkynningu á heimasíðu félagsins að fundur hafi verið haldinn með starfsmönnunum og þeim tilkynnt um ákvörðunina.

Hluti starfsmannan rækjuvinnslunnar mun þó fara til annarra starfa hjá Samherja. Fram kom á fundinum að Samherji mun aðstoða alla eftir fremsta megni við að fá vinnu á Akureyri og hefur gert samning við Capacent vegna þess. Auk þess hefur verið rætt við forsvarsmenn annarra matvælafyrirtækja á Akureyri.

Bent er á í tilkynningu Samherja að rekstur rækjuverksmiðja hafi verið mjög erfiður undanfarin ár og þessi ákvörðun komi fáum á óvart sem fylgst hafi með fréttum af þeim vettvangi. „Rekstur rækjuverksmiðja hér á landi síðustu misserin byggir að stærstum hluta á innfluttu hráefni, enda veiðin við Ísland í fyrra sú minnsta í 40 ára sögu rækjuveiða. Rækjuverksmiðjum hefur fækkað jafnt og þétt undanfarin ár, bæði hér á landi og annars staðar. Nú er svo komið að aðeins 4-5 verksmiðjur eru starfandi á Íslandi en þær voru rúmlega 30 þegar mest var fyrir nokkrum árum," segir í tilkynningunni.

Haft er eftir Gesti Geirssyni, framkvæmdarstjóra landvinnslu Samherja hf., að það sé mjög sárt að þurfa að grípa til þess að loka rækjuvinnslunni. „Við höfum á undanförnum árum hagrætt verulega í rekstri rækjuverksmiðjunnar til að halda honum gangandi, í þeirri von að aðstæður breyttust til hins betra. Það hefur hins vegar ekki gerst, heldur hafa rekstrarskilyrðin þvert á móti versnað. Ofursterk króna í kjölfar glórulausrar vaxtastefnu Seðlabanka orsakar óviðundandi starfsumhverfi fyrir útflutningsgreinarnar og veldur fjöldauppsögnum víða eins og komið hefur fram á undanförnum mánuðum," segir Gestur enn fremur.