Borgarfulltrúar greiði úr eigin vasa fyrir boðsferðir

Oddný Sturludóttir, borgarfulltrúi Samfylkingarinnar, segir á vefsíðu sinni að borgarfulltrúar eiga að greiða sjálfir fyrir boðsferðir sem þeim er boðið að taka þátt í.

Íþróttafélög og önnur hagsmunasamtök sem eiga í samskiptum við borgina um fjárveitingar, lóðaúthlutanir og annað sem tengist starfsemi og rekstri þeirra bjóða mörg hver borgarfulltrúum og embættismönnum borgarinnar að þiggja boð í veislur og aðrar uppákomur á þeirra vegum. Líkt og kom fram á Vísi fyrr í gær verður árlegt golfmót borgarstjórnar í boði Golfklúbbs Reykjavíkur. Að leik loknum verður haldin verðlaunaafhending og kvöldverður í boði golfklúbbsins.

Oddný segist hafa áður þegið boð á golfmótið og umtalað boð hestmannafélagsins Fáks í vor. Hún segir að nú renni öll vötn í þá átt að stjórmálamenn verði að vera hafnir yfir allan vafa hvort sem um að er ræða laxveiði, golf, útreiðar eða berjamó.

Oddný segir að borgarfulltrúar og forystumenn félagasamtakanna geti vel haldið áfram að eiga góða stund saman í golfi eða útreiðum. ,,En við borgarfulltrúar erum borgunarmenn fyrir slíku sjálf - og rúmlega það," segir Oddný að lokum.

Skrif Oddnýjar Sturludóttur, borgarfulltrúa, er hægt að lesa hér.