Herragarðurinn semur við birgja og lækkar verð út árið

„Við höfum notað síðustu tvær vikur í þessa vinnu og viljum skila því til fólksins í landinu," segir Hákon Hákonarson framkvæmdarstjóri fyrirtækisins Föt og Skór sem rekur fjórar verslanir í Kringlunni og Smáralind. Hagstæðir samningar hafa náðst við birgja verslanna sem gerir það að verkum að allar vörur í búðunum lækka um 20% út árið.

„Við höfum átt í mjög persónulegum og góðum samböndum við okkar birga. Þeir hafa sýnt ástandinu mikinn skilning og enginn verið með neinn hroka í okkar garð," segir Hákon sem þó vill taka það fram að enginn af sínum birgjum séu í Bretlandi. „Það er kannski nokkuð heppilegt í þessari stöðu."

Fyrirtæki Hákonar rekur Herragarðinn í Smáralind, Boss búðina, Herragarðinn og verslun sem heitir B&S í Kringlunni.

Hákon segir að 20% afsláttur verði á öllum vörum í búðunum út árið og fólk geti treyst því. „Við erum langt frá því að nota gengisvísitöluna 200 heldur það sem var hér í haust. Við höfum ekki hækkað verð og það er engin græðgisvæðing hjá okkur. Svo lengi sem við eigum fyrir launum, húsaleigu og öðrum kostnaði þá dugar það í bili. Græðgissjónarmiðin eru farin," segir Hákon sem hvetur kaupmenn til þess að gera allt sem í þerra valdi stendur til þess að berjast við verðbólguna.

„Við kaupmenn köllum eftir því að nú verði sótt um aðild í evrópusambandið eins fljótt og auðið er. Menn verða bara að hætta að vera veruleikafirrtir," segir Hákon sem hvetur fólk til þess að vinna sig saman út úr ástandinu.