Mikilvægt að bankakerfinu sé rétt hjálparhönd

Guðni Ágústsson, formaður Framsóknarflokksins, segir nýjasta úspil ríkisstjórnarinnar sýna að Davíð hafi sigrað Golíat. Hann segir bankana hafa séð að þeir ráði ekki við stöðuna og fagnar þessu skrefi ríkisstjórnarinnar.

„Verkalýðshreyfningin og stjórnarandstaðan hafa ekki tekið þetta í mál og Sjálfstæðisflokkurinn gefur sig núna þannig að ég fagna þessu skrefi sem þó er ekki stórt en jákvætt," segir Guðni sem hefði viljað sjá hámarkslán hækka meira en úr 18 í 20 milljónir.

Hann segir mikilvægt að bankakerfinu sé rétt hjálparhönd við þessar aðstæður og í megindráttum sé þetta jákvæð niðurstaða sem styrki Íbúðarlánasjóð til framtíðar.

„Við framsóknarmenn teljum mikilvægt að Íbúðalánasjóður sé enn á þessum markaði og höfum margsagt. Það var mikið fagnaðarefni að hann var ekki seldur til bankanna enda stóðum við gegn því."

Guðni saknar þess þó að enn sé skortur á lánsfé í landinu og ekki bóli á neinni úrlausn ríkissjórnarinnar eða Seðlabankans hvað það varðar.

„Við blasa alvarlegir hlutir hjá atvinnufyrirtækjum og skuldugum heimilum ef vextir sem þessir eiga að vera áfram. Ég skil ekki hvað dregur ríkisstjórnina í að klára þau mál sem hún hefur þóst vera að ráðast í," segir Guðni að lokum.