Afnám brunabótamatsins stórsigur fyrir lántakendur

Ingibjörg Þórðardóttir, formaður félags fasteignasala, segir aðgerðir ríkisstjórnarinnar skref í rétta átt og breytinguna á brunabótamatinu segir hún stórsigur fyrir lántakendur. Ingibjörg hefði þó viljað sjá hámarkslánin fara örlítið hærra.

„Auðvitað fögnum við þessum skrefum sem stigin eru þarna og sérstaklega því að brunabótaviðmiðið sé fallið út og það er mikil leiðrétting,“ segir Ingibjörg en brunabótaviðmið lánveitinga íbúðalanasjóðs verður nú afnumið en þess í stað verður miðað við allt að 80 prósentum af kaupverði eignar.

Auk þess hækka hámarkslán í 20 milljónir króna í stað 18. Ingibjörg hefði þó viljað sjá það fara hærra.

„Það munar auðvitað um þessar tvær milljónir en ég hefði viljað sjá þetta fylgja vísitöluhækkun frá 1.júlí 2004 og þá hefði hámarkslán farið í 23 milljónir. Þetta er vonandi fyrsta skrefið í átt að því að lánið verði hækkað enn frekar,“ segir Ingibjörg.

Hún segir gott að sjá að Íbúðalánasjóður sé metinn að verðleikum og að hann geti gripið inn í lánamarkaðinn með þessum hætti. Ingibjörg vonast til þess að þetta séu aðeins fyrstu sporin í því að bæta stöðu almennings á lánamarkaði og geri fólki kleift að kaupa sér húsnæði.

„Afnám brunabótamatsins er áralangt baráttumál og það er því stórsigur fyrir lántakendur að þetta sé út af borðinu,“ segir Ingibjörg að lokum.