Frakkar elta Rússa við Ísland

Búast má við að talsverður fjöldi rússneskra sprengjuflugvéla fari um íslenska loftvarnasvæðið á næstu vikum og mánuðum.

Vélarnar verða á leið til og frá Venesúela en þangað stefnir nú rússnesk flotadeild til æfinga.

Norskar og breskar orrustuþotur munu fylgja þeim eftir og einnig NATO þotur frá Íslandi, ef þá verða einhverjar staðsettar hér.

Og það má búast við að NATO auki viðveru orrustuflugvéla hér á landi með tilliti til aukinna hernaðarumsvifa Rússa.

Það myndi allavega gleðja orrustuflugmenn í flugherjum NATO en þeir elska að fljúga með rússneskum sprengjuflugvélum.

Þannig var eftirsótt hjá bandarískum orrustuflugmönnum að fara til Íslands meðan Bandaríska varnarliðið var staðsett hér.

Í sumar var hér frönsk flugsveit í einhverjar vikur og flaug nokkrum sinnum til móts við rússneskar sprengjuflugvélar, eins og sjá má á meðfylgjandi mynd.