Starfsmenn Nýherja lækka í launum

Nýherji hefur ákveðið að bregðast við óvissu og breyttu efnahagsumhverfi hérlendis með lækkun launa og rekstarkostnaðar. Laun allra starfsmanna félagsins og dótturfélaga hér á landi lækka um 10%.

Laun starfsmanna með grunnlaun, sem eru undir 300 þúsund krónur á mánuði, haldast óbreytt. Markmiðið með þessum aðgerðum er að vernda störf starfsmanna eins og kostur er á þeim óvissutímum sem eru framundan í íslensku efnahagslífi.

Laun starfsmanna lækka um 10% frá 1. febrúar 2009. Launalið í samningum starfsmanna verður sagt upp skriflega með þriggja mánaða fyrirvara. Laun forstjóra og framkvæmdastjóra lækka um 10% strax frá 1. nóvember. Þá kann að verða rætt við einstaka starfsmenn um hvort þeir taki að sér hlutastarf til að mæta hugsanlegum samdrætti í þeirra verkefnum.

Einnig hefur reynst nauðsynlegt að ganga nú frá starfslokum 15 starfsmanna af 550 hérlendis vegna fyrirsjáanlegs samdráttar. Beitt verður ýtrasta aðhaldi í rekstri og dregið úr þróunarkostnaði og öðrum útgjöldum eins og kostur er.

„Fjárhagsstaða Nýherja er traust og félagið hóflega skuldsett, en fyrirsjáanlegt er að sú erfiða staða sem er í íslensku efnahagslífi geti haft áhrif á tekjur og rekstur félagsins. Launakostnaður er nærri 80% af rekstrarkostnaði Nýherja og því nauðsynlegt að lækka þann kostnað. Við viljum grípa til aðgerða strax í ljósi aðstæðna," segir Þórður Sverrisson forstjóri Nýherja.

„Megin áhersla okkar á næstu vikum og mánuðum felst þar af leiðandi í því að skila viðunandi afkomu í öllum félögum, renna enn styrkari stoðum undir starfsemi þeirra og um leið að verja störf starfsfólksins. Með þessum aðgerðum og innleiðingu á nýju viðskiptamódeli getum við búið í haginn fyrir nýja sókn á næstu misserum."

Félög Nýherja samstæðunnar eru 20 bæði hér heima og erlendis. Dótturfélögin hér á landi eru TM Software ehf., Applicon ehf., ParX ehf., Sense ehf., Linkur ehf., SimDex ehf., Klak ehf., Vigor ehf., Skyggnir ehf., Origo ehf. og eMR ehf. Um 720 starfa í allri samstæðunni, þar af eru um 550 hér á landi og 170 í dótturfélögum erlendis.

Þetta kemur fram í tilkynningu frá Nýherja.