Saka stjórn um að keyra sjúkratryggingafrumvarp í gengum þingið

Þingmenn stjórnarandstöðunnar gagnrýndu á Alþingi í dag að taka ætti til umfjöllunar frumvarp um sjúkratryggingar sem meðal annars gerir ráð fyrir nýrri sjúkratryggingastofnun. Málið væri of viðamikið til þess að hægt væri að ræða það vel á þeim sjö þingdögum sem eftir væru.

Siv Friðleifsdóttir, þingflokksformaður Framsóknarflokksins, benti á að búið væri að auglýsa starf forstjóra Sjúkratryggingastofnunar. Vísaði hún til þess að Valgerður Sverrisdóttir, varaformaður flokksins, hefði gagnrýnt þann hroka sem falist hefði í þeirri ákvörðun heilbrigðisráðherra því stofnunin væri ekki til.

Sagði Siv að frumvarp um málið hefði fyrst komið fram í dag. Frumvarpið hefði að geyma 72 greinar og fjögur bráðabirgðaákvæði. Það þyrfti að veita afbrigði frá þingstörfum til þess að taka málið fyrir og núverandi meirihluti væri svo sterkur að hann gæti veitt sjálfum sé afbrigði. Sagði hún það ólíðandi ef það ætti að ætti að klára málið fyrir þinglok. „Á virkilega að traðka hér á þingræðinu?" spurði Siv.

Grundvallarbreyting á heilbrigðiskerfinu

Valgerður Sverrisdóttir, varaformaður Framsóknarflokksins, benti á að fregnir hefðu borist af því að málið hefði verið lengi inni í ríkisstjórninni og mótmælti hún því að klára ætti málið fyrir þinglok. Hér væri á ferðinni grundvallarbreyting á heilbrigðiskerfinu og slíkt þyrfti að ræða ítarlega. Sagði hún betra að forseti þingsins lýsti því yfir að málið yrði geymt til haustsins. Þess má geta að frumvarpið á að taka gildi í haust.

Áhersla á að afgreiða málið fyrir vor

Ásta Möller, þingmaður Sjálfstæðisflokksins og formaður heilbrigðisnefndar, benti á að vitað hefði verið að von væri á frumvarpinu. Samþykkt hefði verið um áramót frumvarp um breytta verkaskiptingu ráðuneyta en í því hefði verið bráðabirðgaákvæði um heimild til að ráða forstjóra Sjúkratryggingastofnunar. Sagði hún að óskað yrði eftir því að frumvarp um sjúkratryggingar yrði tekið til umræðu á þingi á morgun og svo væri hægt að nýta nefndardaga til þess að ræða það vel. Lögð væri áhersla á að það yrði afgreitt fyrir vorið.

Hvenær eiga umsagnaraðilar að gefa álit sitt?

Kolbrún Halldórsdóttir, þingmaður Vinstri - grænna, mótmælti því sem hún kallaði hroka Ástu Möller. Spurði hún hvernig umsagnaraðilar ættu að geta greint frá sínum sjónarmiðum ef fjalla ætti um frumvarpið á nefndardögum í næstu viku. Sjö þingfundadagar væru eftir fram á vor og það væri út úr öllu korti að setja mál, sem gerði ráð fyrir að allt heilbrigðiskerfið færi á markað, nú á dagskrá. Hún treysti því að forseti neitaði að taka málið á dagskrá.