Verðbólga lækkar í 14 prósent

Verð á fötum og skóm hækkaði um 11,2 prósent milli mánaða, aðallega vegna sumarútsöluloka, og þá hækkaði verð á þjónustu um 1,1 prósent, þar af voru vísitöluáhrif af verðhækkun á opinberri þjónustu 0,08 prósent og af verðhækkun annarrar þjónustu 0,22 prósent.

Kostnaður vegna eigin húsnæðis lækkaði hins vegar um 0,7 prósent. Þar af voru áhrif af lækkun markaðsverðs -0,14 prósent en áhrif af hækkun raunvaxta voru 0,03 prósent. Enn fremur lækkaði verð á nýjum bílum um 1,8 prósent.

Sem fyrr segir er ársverðbólgan 14 prósent en athygli vekur að verðbólga án húsnæðis er 14,7 prósent. Það er því lækkun á húsnæðisverði sem er að draga úr verðbólgunni ólíkt því sem var fyrir nokkrum misserum. Undanfarna þrjá mánuði hefur vísitala neysluverðs hækkað um 2,7 prósent sem jafngildir 11,4 prósenta verðbólgu á ári.