Björgvin og Darling ræddu um að breyta Icesave

Á fundi Björgvins G. Sigurðssonar, viðskiptaráðherra, og Alistair Darling, fjármálaráðherra Bretlands, 2. september var meðal annars rætt um að breyta Icesave í dótturfélag þannig að íslensk stjórnvöld bæru ekki ábyrgð á starfsemi bankans.

Darling sagði í samtali við Árna Mathiesen, fjármálaráðherra, 7. október að það sem fram hefði komið á fundi hans með Björgvini í byrjun september hefði ekki reynst rétt. ,,Ég hafði mjög miklar áhyggjur af stöðu bankans í London og þeir héldu áfram að segja okkur að ekkert væri að óttast. Og þú veist, í þeirri stöðu sem við erum í núna, þá er hér í þessu landi fjöldi fólks sem lagði inn fé og það kemur til með að tapa ansi miklu af peningum og það fólk mun eiga erfitt með að skilja hvernig það gerðist," sagði Darling við Árna. Kastljós birti fyrr í kvöld afrit af samtali Árna og Darling.

Í seinnifréttum Ríkissjónvarpsins er haft eftir Jóni Þóri Sturlusyni, aðstoðarmanni viðskiptaráðherra, að Björgvin kannist ekki við að hafa sagt við Darling að ekki bæri að óttast stöðu Icesave. Þvert á móti.

Viðskiptaráðherra muni fara yfir gögn frá fundinum með Darling og í framhaldinu tjá sig um málið á morgun.

Auk Björgvins og Jón Þórs sátu Jón Sigurðsson stjórnarformaður Fjármálaeftirlitsins, Jónína S. Lárusdóttir ráðuneytisstjóri viðskiptaráðuneytisins og Baldur Guðlaugsson ráðuneytisstjóri fjármálaráðuneytisins fundinn með Darling.