Darling: Orðspor Íslands mun bíða hræðilega hnekki - Samtalið við Árna

,,Þú verður að gera þér ljóst að orðspor þjóðar þinnar bíður hræðilega hnekki," sagði Alistair Darling, fjármálaráðherra Bretlands, í samtali við Árna Mathiesen, fjármálaráðherra, í síma 7. október. Kastljós birti í kvöld samtal þeirra en lesið var upp af afrit af símtali ráðherranna sem hafði verið þýtt yfir á íslensku.

„Ég verð að segja eins og er að þegar ég hitti kollega þína og þá hina, þá í raun kemur í ljós að það sem okkur var sagt reyndist ekki rétt. Ég hafði mjög miklar áhyggjur af stöðu bankans í London og þeir héldu áfram að segja okkur að ekkert væri að óttast. Og þú veist, í þeirri stöðu sem við erum í núna, þá er hér í þessu landi fjöldi fólks sem lagði inn fé og það kemur til með að tapa ansi miklu af peningum og það fólk mun eiga erfitt með að skilja hvernig það gerðist," sagði Darling.

Darling spurði Árna hvort að íslensk stjórnvöld tryggðu innistæður sparifjáreigenda í íslensku bönkunum og svaraði Árni að það ætti við reikninga á Íslandi.

Þá spurði Darling Árna hvort það væri ekki andstöðu við samninginn um Evrópska efnhagssvæðið að tryggja ekki innstæður íslensku bankanna í útibúum utan Íslands. Árni svaraði: ,,Nei, það teljum við ekki. Reyndar tel ég það vera í samræmi við það sem aðrar þjóðir hafa verið að gera undanfarna daga."

Í framhaldinu spurði Darling hvort nægt fé væri í tryggingarsjóðum. Árni sagði að mögulega væri svo ekki. ,,Það er hræðileg staða," sagði Darling.

,,Þú verður að gera þér ljóst að orðspor þjóðar þinnar bíður hræðilega hnekki," sagði Darling.