Minna magn af fíkniefnum í Fáskrúðsfjarðarmáli en segir í ákæru?

Vera kann að sakborningar í Fáskrúðsfjarðarmálinu fái mildari dóma ef í ljós kemur að magnið sem þeir fluttu inn er minna en fram kemur í ákæru.

Dómari í málinu ákvað við þingfestingu í morgun að efnin skyldu vigtuð á ný eftir að sakborningar höfðu lýst því yfir efasemdum um að magnið væri jafnmikið og fram kæmi í ákæru.

Samkvæmt henni er um að ræða 23,5 kíló af amfetamíni, 13,9 kíló af e-töfludufti og 1746 e-töflur. Sakborningar segja hins vegar að raki hafi komist í efnin og því hafi þau verið þyngri við vigtun lögreglu en raunin sé.

Heimildir Vísis herma að við vigtun efnanna hjá Háskóla Íslands hafi komið í ljós að efnin hafi verið allt að 30 prósentum léttari en gert er ráð fyrir í ákæru. Slíkt getur haft áhrif á niðurstöðu dómsins því hann tekur meðal annars mið af magni og styrkleika efna við ákvörðun refsingar.

Friðrik Smári Björgvinssion, yfirlögregluþjónn á höfuðborgarsvæðinu, kannaðist ekki við að magn efnanna væri minna en í ákæru greindi en benti á að ef vafi væri um það myndi dómari í málinu að líkindum fara fram á að efnin yrðu endurvigtuð.

Við þetta má bæta að samkvæmt fyrstu fregnum af málinu var um að ræða um það bil 60 kíló af fíkniefnum. Við nánari skoðun reyndust þau hins vegar um 40 kíló og það er þess magns sem getið er í ákæru.