Fjölskylda Ásgeirs djúpt snortin

Fjölskylda Ásgeirs Lýðssonar, tæplega tveggja ára drengs á Selfossi sem þjáist af nýrnasjúkdómi og litningagalla, er afar þakklát fyrir stuðning sem þau hafa fengið eftir umfjöllun á Vísi fyrir jól. "Við erum djúpt snortin yfir viðbrögðum fólks og viljum koma á framfæri þakklæti til allra þeirra sem hafa stutt okkur" segir Ágústa Sigurðardóttir, móðir Ásgeirs.

Egill Árnason gaf fjölskyldunni baðkar sem vantaði sárlega á heimilið til að baða Ásgeir og Forlagið lagði til 50 þúsund eins og Vísir. Þá færðu sjúkraflutningamenn í Árnessýslu fjölskyldunni 50 þúsund krónur á aðfangadag sem Landsbankinn jafnaði. Auk þess hafa fjölmargir einstaklingar lagt til minni fjárhæðir.

"Þetta skiptir gríðarlega miklu máli fyrir okkur, ekki síst nú í janúar þegar Lýður (faðir Ásgeirs) verður í landi," segir Ágústa, en Lýður er sjómaður og hefur misst töluvert úr vinnu vegna veikindanna. "Það er náttúrulega frábært að fá baðkarið því Ásgeir veit fátt skemmtilegra en að fá að busla, auk þess getum við keypt ýmislegt sem vantar fyrir hann."

Ágústa segir að þegar fólk standi í svona lífsreynslu sé tilfinningalegur stuðningur ekki síður mikilvægur en fjárhagslegur stuðningur; "og fyrir honum höfum við svo sannarlega fundið líka," segir hún að lokum.

Umfjöllun um veikindi Ásgeirs má finna hér.