Björn Ingi og Vilhjálmur hefðu átt að greiða skatt af veiðiferðinni

Björn Ingi Hrafnsson og Vilhjálmur Þ. Vilhjálmsson hefðu átt að greiða skatt vegna veiðiferðarinnar sem þeir fóru ásamt Hauki Leóssyni og Guðlaugi Þór Þórðarsyni í ágúst í fyrra. Þetta er mat skattalögfræðings sem Vísir ræddi við.

Haukur Leósson, Björn Ingi Hrafnsson, Guðlaugur Þ. Þórðarson og Vilhjálmur Þ. Vilhjálmsson veiddu í Miðfjarðará dagana 11. - 14 ágúst í fyrra, þann tima sem Baugur var með ána á leigu. Guðlaugur fullyrðir að hann hafi sjálfur greitt fyrir sína ferð en Haukur Leósson bauð Birni Inga og Vilhjálmi.

Ólafur Kristjánsson, skattalögfræðingur hjá Logos, sagði í samtali við Vísi að strangt til tekið væru svona gjafir skattskyldar, sérstaklega þar sem upphæðin væri yfir því sem eðlilegt gæti talist þegar gjafir væru annars vegar. Það ylti hins vegar allt á heiðarleika þeirra sem ættu í hlut.

Í sjöundu grein laga um tekjuskatt segir að skattskyldar séu beinar gjafir í peningum eða öðrum verðmætum, þar með talin afhending slíkra verðmæta í hendur nákominna ættingja, nema um fyrirframgreiðslu upp í arf sé að ræða. Undanskildar séu þó tækifærisgjafir, enda sé verðmæti þeirra ekki meira en almennt gerist um slíkar gjafir svo og verðlitlir vinningar í almennum happdrættum og keppnum.

Vilhjálmur greiddi ekki skatt af veiðiferðinni. Björn Ingi sagði hins vegar í samtali við Vísi að hann vildi ekki tjá sig meira um þetta mál en hann hefði þegar gert.

Hjá Ríkisskattstjóra fengust þær upplýsingar að ekki væri komin framkvæmd á þetta ákvæði sem um ræði. Ekki sé vitað til þess að gengið hafi úrskurður hjá yfirskattanefnd vegna málsins og ekki séu komnar neinar verklagsreglur um neinar fjárhæðir þessu tengdu. Ekki náðist í Gest Steinþórsson, skattstjóra í Reykjavík, við vinnslu þessarar fréttar.