Jón Ásgeir og Hannes fóru ekki með í Miðfjarðará

Jón Ásgeir Jóhannesson stjórnarformaður Baugs og FL Group, og Hannes Smárason, fyrrverandi forstjóri FL Group og þáverandi stjórnarformaður Geysis Green Energy, voru ekki í veiðiferðinni í Miðfjarðará sem Vísir greindi frá fyrr í dag. Þetta staðfesti Jón Ásgeir Jóhannesson í samtali við Vísi í dag.

Eins og kom fram fyrr í dag fóru Guðlaugur Þór Þórðarson heilbrigðisráðherra, Vilhjálmur Þ. Vilhjálmsson fyrrverandi borgarstjóri, Haukur Leósson fyrrverandi stjórnarformaður Orkuveitunnar og Björn Ingi Hrafnsson fyrrverandi varaformaður stjórnar Orkuveitunnar og REI, í veiði í Miðfjarðará í ágústmánuði á síðasta ári.

Þeir dvöldu ásamt Stefáni Hilmarssyni fjármálatjóra Baugs og eiginkonum sínum við veiðar í þrjá daga en Baugur hafði tekið frá veiðileyfi fyrir mannskapinn þessa helgi. Rúmlega mánuði síðar komu upp á yfirborðið hugmyndir um að sameina REI og GGE en síðarnefnda félagið var að langstærstum hluta í eigu Baugs í gegn um eignarhlut sinn í FL Group.

Guðlaugur og félagar segjast ekki hafa vitað að veiðiferðin hafi verið í boði Baugs og að málefni REI og GGE hafi ekki verið rædd í ferðinni. Guðlaugur segist til að mynda hafa verið boðinn í ferðina af Hauki Leóssyni og gert upp við hann að veiðiferðinni lokinni. Björn Ingi og Vilhjálmur segja að þeir hafa þegið boð Hauks í ferðina og að hann hafi greitt veiðileyfin fyrir þá.