Forstjórinn fagnar niðurstöðum geislafræðinga

Björn Zoega, settur forstjóri Landspítala, segist fagna niðurstöðu geislafræðinga um að fresta uppsögnum sínum um mánuð.

Björn segist vonast til þess að ákvörðun þeirra hafi áhrif á ákvörðun hjúkrunarfræðinga, en um eitt hundrað hjúkrunarfræðingar munu að öllu óbreyttu láta af störfum í kvöld.

Björn segir að nefnd geislafræðinga og stjórnenda spítalans muni taka til starfa undir hans forystu á föstudag. Björn segir það ekki vera vandamál að einungis sé mánuður til stefnu þegar fyrir liggi að það sé raunverulegur vilji beggja aðila til að finna vaktafyrirkomulag sem henti öllum.