Hefur ekkert heyrt í dóttur sinni síðan í janúar

Dagbjört Rós Halldórsdóttir hefur ekki séð rúmlega tveggja ára gamla dóttur sína síðan í janúar. Hún flýgur til Bandaríkjanna á morgun með von um að hitta stúlkuna en barnsfaðir hennar svarar hvorki tölvupóstum né símtölum.

„Ég er náttúrulega mjög spennt en smá kvíðin líka. Ég hef ekkert heyrt í henni síðan í janúar og veit því ekkert hvað mætir mér þarna úti," segir Dagbjört sem hefur reynt margt til þess að komast í samband við dótturin sína sem heitir Caitlin.

Vísir hefur fylgst með baráttu Dagbjartar sem fékk ekki landvistarleyfi í Bandaríkjunum og þurfti því að skilja stúlkuna eftir. Síðan þá hefur hún átt í harðri forræðisdeilu en hefur umgengisrétt yfir stúlkunni þegar hún kemur til Bandaríkjanna.

„Lögfræðingurinn minn hefur reynt að ná sambandi við lögfræðing hans[barnsföður Dagbjartar] en án árangurs. Við vitum í sjálfu sér ekkert hvort hann er þarna eða einhversstaðar annarsstaðar. Ef hann er þarna verður hann að láta mig hafa stelpuna," segir Dagbjört en aðalmeðferð í forræðismálinu fer fram í Bandaríkjunum 5. og 6.júní.

„Þessi ferð var bara plönuð einn, tveir og þrír. Ég verð bara að fá að vita hvort það sé í lagi með barnið mitt og þetta er eina leiðin."

Barátta sem þessi kostar sitt og hafa vinir og kunningjar Dagbjartar staðið með henni. Meðal annars eru á dagskránni tónleikar til styrktar Dagbjörtu þann 15.maí á Nasa. Þar koma fram m.a. Páll Óskar, Buff og Helga Dýrfinna.

„Þá verða mestu fjárútlátin og því er þetta kærkomið. Núna hefur kostnaðurinn aðallega farið í þessi ferðalög en þegar réttarhöldin hefjast þarf ég að borga lögfræðingnum mínum o.fl.."

Dagbjört vonast til þess að geta eytt rúmri viku með dóttur sinni og ætlar að koma aftur heim þann 3.maí.