Farið fram á áframhaldandi gæsluvarðhald í stóra hassmálinu

Lögreglan á höfuðborgarsvæðinu mun nú fyrir hádegi fara fram á það að tónleikahaldarinn Þorsteinn Kragh og Hollendingur, sem grunaðir eru um umfangsmikið fíkniefnasmygl með Norrænu, verði úrskurðaðir í áframhaldandi gæsluvarðhald.

Lögreglan lagði hald á um 190 kíló af hassi, eitt og hálft kíló af marijúana og eitt kíló af kókaíni í húsbíl Hollendingsins sem kom til landsins með Norrænu 10. júní. Hollendingurinn hefur frá þeim tíma setið í gæsluvarðahaldi.

Þorsteinn var hins vegar handtekinn í byrjun júlí í tengslum við rannsókn málsins og hefur setið í gæsluvarðhaldi síðan. Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, sagði rannsókn málsins enn í fullum gangi og að farið yrði fram á gæsluvarðhald á grundvelli rannsóknarhagsmuna.