Málningu hent í hús byggingarfulltrúa

„Við erum búin að kæra til lögreglu," segir Vilborg Gestsdóttir, eiginkona Magnúsar Sædals byggingarfulltrúa Reykjavíkurborgar. Í nótt var málningu hent í hús Magnúsar til að mótmæla framgöngu borgarinnar í umhverfisátakinu sem stendur nú yfir.

Mennirnir sem hentu málningu í húsið og krotuðu á það: 1,2 og Reykjavík - farðu í rassgat, lýsa ódæðinu á hendur sér í pósti til fjölmiðla. Þeir mótmæla því að póstar hafi verið sendir á 500 manns og dagssektum hótað ef lagfæringar á húsum og görðum hafa ekki átt sér stað fyrir 1. ágúst.

„Magnús og allir þeir aðrir sem standa á bakvið þetta átak: Takið til í ykkar óreiðuhausum og látið annað fólk í friði," segir í póstinum sem er nafnlaus.

Magnús Sædal var ekki við þegar Vísir hringdi heim til hans. Vilborg, eiginkona hans, sagði hann hafa unnið hörðum höndum við að mála yfir skemmdarverkin. „Það á að mála yfir allt krot um leið," segir Vilborg.

Hún segir dóttir sína hafa vaknað í nótt við læti í garðinum og séð fjóra menn hlaupa frá vettvangi. „Maður skilur bara ekki svona hegðun. Magnús er einungis að sinna sínum embættisskyldum," segir Vilborg.

Vísir ræddi við Magnús fyrr í dag um fegrunarátak borgarinnar. Hann minntist ekkert á skemmdarverkin á húsi sínu en sagði „...það eru alltaf einhverjir sem eru aldrei ánægðir, en í heildina eru flestir sáttir."