Andlát lögreglustjóra Manchester rannsakað - ekkjan gefur skýrslu

Ekkja Mikes Todd, fyrrum lögreglustjóra Manchester, komst að því þremur dögum fyrir andlát manns síns að hann átti sér hjákonu, eftir því sem hún hefur sagt rannsóknarnefnd sem skipuð var í kjölfar dauða Todd.

Lík hans fannst ásamt tómri ginflösku við rætur Snowdon, hæsta fjalls Wales, í mars og reyndist áfengismagn í blóði lögreglustjórans verulegt. Ljóst er að hann hrapaði ekki til bana en dánardómstjóri Norðvestur-Wales mun skera úr um hvort hann hafi stytt sér aldur eða dauða hans hafi borið að með öðrum hætti.

Dave Whatton, yfirlögregluþjónn í Manchester, tjáði rannsóknarnefndinni að viðbragðsáætlun hefði verið sett í gang eftir að ekkjan, Carolyn Todd, sagði lögreglunni að hún hefði gengið á mann sinn og spurt hann um framhjáhaldið. Todd hafði þá verið saknað í þrjá daga.

Eftir dauða hins fimmtuga lögreglustjóra leiddi rannsókn í ljós að hann hafði haft um tylft hjákvenna á fimm ára tímabili. Ekkja Todd hefur ekki stöðu vitnis við rannsóknina á dauða manns síns en mun gefa rannsóknarnefndinni munnlega yfirlýsingu.