Telur líklegt að Guðjón Arnar styðji sig

Sigurjón Þórðarson, fyrrverandi þingmaður Frjálslynda flokksins, telur allt eins líklegt að Guðjón Arnar Kristjánsson, formaður flokksins, muni styðja sig í embætti formanns á næsta landsþingi flokksins. ,,Hlutirnir eru fljótir að breytast og það er ekkert útilokað."

Stjórn kjördæmafélags Frjálslynda flokksins í Reykjavík hefur skorað á Sigurjón að gefa kost á sér til formennsku. Það sama gerði stjórn flokksins í Eyjafirði nýverið. Guðjón segir að hann stefni á að gefa kost á sér til áframhaldandi setu sem formaður og í samtali við Vísi nýverið sagðist hann ekki óttast kosningar um embættið.

Aðspurður hvort hann njóti stuðnings innan flokksins til að taka við sem formaður segir Sigurjón að yfirleitt sé tekið vel í hugmyndina. ,,Sumir sjá einhverja hættu í þessu en ég get ekki séð annað en að það sé jákvætt að fólk sé tilbúið að taka að sér ábyrgðarstörf."

Sigurjón telur að það sé vilji flokksmanna að ná fram breytingum á flokksstarfinu. ,,Fólk vill jafnframt að þetta fari vel fram og menn forðist persónulegar illdeilur."

Reykjavíkurfélög Frjálslynda flokksins boða til fundar í kvöld og eru Guðjón Arnar og Jón Magnússon, þingmaður flokksins, framsögumenn. Aðspurður hvort hann ætli á fundinn segir Sigurjón: ,,Nei. Ég er bara í vinnunni og að skoða Reiðhöllina. Það er rosa ball hérna um helgina. Þetta er Laufskálaréttarballið. Þannig að ég er bara að sinna minni vinnu." En Sigurjón starfar sem framkvæmdastjóri Heilbrigðiseftirlits Norðurlands vestra.