Undirskriftarlistar gegn nýrri Bónusverslun í miðbænum

Bónus ráðgerir að opna nýja þúsund fermetra verslun í húsi Iðnaðarmannafélagsins við Hallveigarstíg 1 í miðbæ Reykjavíkur. Opnunin fer misjafnlega í íbúa í grenndinni sem þegar hafa safnað undirskriftum gegn opnun verslunarinnar. Íbúarnir eru ósáttir við opnunina í ljósi mikilla bílastæðavandræða sem nú þegar eru á svæðinu. Júlíus Vífill Ingvason formaður skipulagsráðs skilur áhyggjur íbúa en segir lítið hægt að gera. Framkvæmdastjóri Bónuss segir ætlunina ekki að ergja íbúa í grendinni og ætlar að vinna að opnuninni í sátt og samlyndi við sem flesta.

Í samtali við Vísi segir íbúi í grendinni sem stendur fyrir undirskriftunum að fjöldi íbúa hafi þegar skrifað undir. Íbúar hafa aðallega áhyggjur af umferðarþunganum sem fylgir slíkri verslun sem eigi ekki að vera staðsett við stuttar og mjóar götur.

Einnig hafi þetta áhrif á gamalgrónar matvöruverslanir í hverfinu og nefnir þar kjörbúðina Þingholt og Vísir á Laugaveginum. Hann segir að nú þegar hafi einhverjum listum verið komið til borgarinnar. „Við höfum samt ekkert á móti Bónus."

Júlíus Vífill segist hafa séð umrædda lista og skilur áhyggjur íbúa. „Þarna er gert ráð fyrir verslunarrými en við getum ekki stýrt því hverskonar verslun fer þarna inn. Við höfum hinsvegar vald yfir því að verslunin valdi ekki ónæði og trufli nærliggjandi íbúabyggð," segir Júlíus og nefnir þar sterk ljósaskilti og aðra áberandi liti í auglýsingaskiltum sem hægt er að stilla í hóf.

Júlíus segir einnig að sjálfur lendi hann gjarnan í vandræðum með bílastæði á þessum reit en þarna eru einungis svokölluð stöðumælastæði.

„Þeir sem reka Bónus eru vanir verslunarmenn og þekkja vel til svona reksturs. Þeir munu væntanlega taka tillit til umferðarþrengsla og fárra bílastæða við skipulag og stærð verslunarinnar."

Guðmundur Marteinsson, framkvæmdastjóri Bónuss, segir ráðgert að opna verslunina um mánaðarmótin nóvember/desember. „Við fengum öll tilskilin leyfi og það er það sem við horfum á," segir Guðmundur.

„Það er alveg á hreinu að við ætlum ekki að ergja íbúa enda græðum við ekki mikið á því. Við munum stilla þessu öllu í hóf og vinna þetta í sátt og samlyndi við sem flesta, eins og við gerum alltaf."