Ekki á dagskrá hjá Siv að sækjast eftir formannsembættinu

Siv Friðleifdóttir þingmaður Framsóknarflokksins segist ekki hafa í hyggju að bjóða sig fram gegn sitjandi formanni Guðna Ágústssyni á flokksþingi Framsóknar í janúar. „Hjá mér hefur ekki annað verið á dagskrá en að styðja Guðna, Valgerði og Sæunni," segir Siv í samtali við fréttastofu. Í Fréttablaðinu í morgun er fullyrt að formannsslagur sé framundan hjá Framsóknarflokknum og heimildir blaðsins segja að Siv og Páll Magnússon muni blanda sér í slaginn.

Siv segir að Guðni hafi tekið við flokknum á erfiðum tímum og að hún hafi stutt hann í því starfi og það hafi ekki verið á dagskrá hjá sér að bjóða sig fram til formanns.

Tillaga um að hefja aðildarviðræður að Evrópusambandinu verður lögð fram á flokksþingi Framsóknarflokksins í Janúar. Þetta var samþykkt á miðstjórnarfundi flokksins í gær. Siv Friðleifsdóttir segir um tímamóta ákvörðun að ræða og gerir fastlega ráð fyrir því að flokksþingið muni samþykkja tillöguna.