Láðist að setja upp borðann

Ingólfur Már Ingólfsson, framkvæmdarstjóri knattspyrnudeildar KR, segir að það hafi verið mistök að setja ekki upp borða í kringum varamannaskýli KR-vallarins í gær.

„Það láðist einfaldlega að setja upp þennan borða. Þetta er eitthvað sem við höfum alltaf gert en það gleymdist því miður í gær," sagði Ingólfur.

Garðar Örn Hinriksson, dómari leiksins, sagði í samtali við Vísi að hann hefði sent skýrslu inn til KSÍ vegna málsins. Ingólfur staðfesti að KSÍ hefði haft samband við KR vegna þessa.

„KR-ingar hafa hins vegar staðið sig mjög vel í öryggisgæslunni en þarna klikkaði eitthvað í gær," sagði Garðar. „En þetta er ekki einu völlurinn þar sem þessu er ábótavant. Það er langt í frá. Á mörgum völlum standa áhorfendur upp við skýli og eiga greiða leið inn á völlinn sem getur verið hættulegt."