Heimir og Pétur ósammála um meint brot

Heimir Einarsson, leikmaður ÍA, og KR-ingurinn Pétur Marteinsson eru ekki sammála um hvort sá síðarnefndi hafi brotið á Heimi skömmu áður en KR skorar síðara mark sitt í leiknum.

Sjá má myndskeið af mörkum KR í gær með því að smella á hlekkinn hér að neðan.

„Ég upplifi þetta ekki þannig að ég hafi brotið á honum," sagði Pétur í samtali við Vísi. „Það var alls enginn ásetningur um brot."

„Ég held að hann hafi hoppað tölvert á eftir mér og þegar ég hoppaði upp í skallaboltann kom ég ekki við hann. En ég upplifði það þannig að hann hafi hoppað upp í olnbogann á mér. Ég náði hreinum skalla."

Heimir segir að um klárt brot hefði verið að ræða að sínu mati. „Ég er að hoppa upp í skallabolta og hann kom með olnbogann í mig fyrir ofan eyrað. Ég er talsvert bólginn eftir þetta," sagði Heimir.

Pétur segir þó að einhvern tímann hefði verið dæmt á hann. „Það er mikið af leikmönnum inn í teignum í föstum leikatriðum og viðbúið að menn lendi saman. En ég klifraði ekki upp á hann. Það er þó dæmt á ýmislegt inn í teig og hefði sjálfsagt einhvern tímann verið dæmt á þetta."