Tvíburar Brangelinu komu undir með gamla laginu

Angelina Jolie þvertekur fyrir sögusagnir þess efnis að nýfæddir tvíburar hennar og Brad Pitt séu glasabörn. Tvíburarnir Knox Leon og Vivienne Marcheline fæddust þann 12. júní síðastliðinn og slúðurblöðin hafa fullyrt að um glasafrjóvgun hafi verið að ræða. Angelina segir hins vegar í viðtali við breska blaðið Hello að þau hjónakornin hafi ekki átt í neinum vandræðum með að geta börnin.

„Ef við hefðum farið í tæknifrjóvgun hefðum við rætt það með ánægju," segir Angelina en bætir því við að þau hafi verið þeirrar gæfu aðnjótandi að hafa aldrei átt í vandræðum með frjósemina. Í sama viðtali viðurkennir Brad að hafa brugðis mjög þegar tvíburar komu í ljós í sónar myndatökunni á sínum tíma. „Við hlógum eins og brjálæðingar," segir leikarinn.

„Við sáum þetta ekki fyrir en systir mín hafði verið að grínast með það daginn áður að líklegast væru þetta tvíburar því hún á tvíbura og afi og amma einnig," sagði faðirinn stoltur, en Pitt er nú á tveimur árum orðinn sex barna faðir. Þau Jolie áttu fyrir hina tveggja ára Shilo og ættleiddu börnin Maddox Pax og Zahara.