Rúmenar dæmdir fyrir tilraun til kortasvika

Héraðsdómur Reykjaness hefur dæmt rúmenskan karl og konu í 35 daga fangelsi fyrir tilraun til fjársvika með greiðslukortum með stolnum upplýsingum.

Fólkið var gripið við komuna til landsins um miðjan maí með 60 kort í fórum sínum sem höfðu að geyma afrit af segulrönd fyrir gild greiðslukort frá Evrópu. Ætluðu þau að nota kortin til þess að ná út fé í hraðbönkum.

Bæði játuðu aðild sína að málinu og var tekið tillit til þess við ákvörðun refsingar. Frá 35 daga fangelsi dregst 18 daga gæsluvarðhald sem fólkið sætti. Þau voru auk þess dæmd til að greiða verjendum sínum samtals 900 þúsund krónur í þóknun.