Hollendingurinn með hægðatregðuna dæmdur í 18 mánaða fangelsi

Rúmlega fertugur hollendingur var dæmdur í 18 mánaða fangelsi í Héraðsdómi Reykjaness í morgun fyrir innflutning á 770 grömmum af kókaíni. Maðurinn var handtekinn við komuna í Leifsstöð í byrjun júní en efnin var hann með innvortis.

Maðurinn var gripinn við komuna til landsins og við röntgenmyndatöku kom í ljós að hann hafði gleypt smokka sem grunur lék á að innihéldu eiturlyf. Illa gekk að koma smokkunum niður og hjálpaði ekki að hann neitaði að taka hægðarlosandi lyf.

Um þriðjungur efnanna hafði skilað sér fjórum dögum eftir að hann var handtekinn og það tók hátt í tvær vikur að ná öllum efnunum út. Eftir að búið var að ná efnunum var maðurinn settur í gæsluvarðhald á Litla Hrauni og var síðan dæmdur í fangelsi í morgun.