Staða Jóns Ásgeirs veikist

Stoðir, sem áttu 30 prósenta hlut í Glitni, fengu í dag greiðslustöðvun, sem alla jafna er undanfari gjaldþrots. Eigendur Stoða horfa því fram á tugmilljarða tap af fjárfestingum sínum. Jón Ásgeir Jóhannesson fer þar fremstur í flokki.

Fjölmargir eiga allt sitt undir þegar kemur að viðskiptum og eignarhlut í Glitni.

Stoðir er stærsti hluthafi Glitnis með rétt rúmlega 30% hlut. Aðrir stórir hluthafar í Glitni eru Þáttur í eigu Karl Wernerssonar, Saxbygg og Salt Investments sem Róbert Wessman á. Allir þessar aðilar tapa gríðarlegum fjárhæðum á ríkisvæðingu Glitnis. Eignarhlutur þeirra líkt og annarra minnkar verulega. Til að mynda verður 30 prósenta hlutur Stoða að 8 prósentum og sex prósenta hlutur Karls Wernerssonar 1,25 prósent.

Ríkið kaupir á genginu 7,5 sem er 51 prósenti minna en gengið var við lokun markaða á föstudag. Markaðsvirði Glitnis hefur því rýrnað um meira en 60 prósent eða 121 milljarð.

Stoðir ramba á barmi gjaldþrots eftir atburði dagsins og hljóta því allir stærstu hluthafar félagsins að eiga verðlitla eign.

Styrkur Invest er stærsti hluthafi Stoða. Í því félagi eru Gaumur og Kaldbakur, fjárfestingafélag Samherja, stærstu eigendur.

Fons, sem er í eigu Pálma Haraldssonar og Jóhannesar Kristinssonar, á 12,2% hlut í Stoðum. Oddaflug Hannesar Smárasonar og Materia Invest, sem er í eigu Magnúsar Ármanns og Þorsteins M. Jónssonar, eru einnig stórir hluthafar í Stoðum. Hlutir þessara aðila eru lítils virði í dag.

Gaumur, sem er einkahlutafélag í eigu Jóns Ásgeirs Jóhannessonar, systur hans Kristínar og foreldra þeirra, yfirtók í sumar nokkrar af eigum Baugs, svo sem Haga, sem eiga Hagkaup og Bónus, 365 og Teymi svo fátt eitt sé nefnt, sem og hlut Baugs í Stoðum með tilheyrandi skuldum.

Jón Ásgeir Jóhannesson er aðaleigandi og lykilmaður í öllum þessum félögum og fyrirtækjum. Það er því ljóst að staða hans hefur aldrei verið veikari.