Tveir yfirheyrðir vegna mannsláts á Skúlagötu

Lögreglan á höfuðborgarsvæðinu yfirheyrir nú tvo menn vegna rannsóknar á andláti manns, sem fannst látinn á heimili sínu við Skúlagötu í Reykjavík í gærkvöldi með höfuðáverka.

Maður sem kom að hinum látna um kvöldmatarleytið og lét lögreglu vita var vistaður í fangageymslum í nótt þar sem hann var í annarlegu ástandi og ekki hæfur til skýrslutöku. Yfirheyrslur yfir honum eru að hefjast og sömuleiðis manni sem lögregla hafði upp á í morgun og talinn er getað varpað einhverju ljósi á málið.

Samkvæmt fyrstu athugunum virðist maðurinn, sem var 68 ára, hafa látist um miðjan dag í gær. Enn er óljóst hvort höfuðáverkar á líkinu eru dánarorsökin. Það skýrist væntanlega á morgun að lokinni krufningu.

Samkvæmt heimildum fréttastofu voru ummerki um að eitthvað hafi gengið á í íbúðinni en ekki er ljóst hvort þar er átt við átök eða meiri háttar veisluhöld.

Maðurinn sem tilkynnti lögreglu um lát mannsins og var tekinn á vettvangi, hefur átt erfitt með að feta veg réttvísinnar en hefur ekki framið ofbeldisbrot. Fréttastofunni er ekki kunnugt um bakgrunn hins mannsins sem lögregla tók til yfirheyrslu í morgun. Enn sem komið er vill lögregla ekki staðfesta að andlátið sé rannsakað sem morð eða andlát en það skýrist líklega þegar líða tekur á daginn.