Líkt og meirihlutinn hafi eitthvað að fela

Meirihluti Sjálfstæðisflokks og Framsóknarflokks í borgarstjórn er neikvæður og tregur til að veita skýr svör þegar kemur að ýmsum útgjöldum borgarsjóðs, að mati Ólafs F. Magnúsonar borgarfulltrúa.

Ólafur lagði til í borgarstjórnar í byrjun september að gerð yrði grein fyrir heildarlaunagreiðslum, ferða- og dagpeningakostnaði, risnu- og veislukostnaði, símgreiðslum og öðrum kostnaði vegna borgarfulltrúa, varaborgarfulltrúa, helstu embættismanna borgarinnar, ásamt stjórnarmönnum, embættismönnum og stjórnendum fyrirtækja í meirihlutaeigu borgarinnar fyrir árin 2005 til 2008. Þar á meðal Orkuveitu Reykjavíkur og Faxaflóahafna.

Lagt var fyrir borgarráð 18. september yfirlit fyrir kostnað við opinberar móttökur á vegum borgarinnar og ferðakostnað borgarfulltrúa.

,,Núverandi meirihluti dregur lappirnar og það er eins og þau hafi eitthvað að fela. Það eru ekki komin svör við þeim spurningum sem ég lagði fram. Ég er enn að bíða eftir frekari svörum," sagði Ólafur í samtali við Vísi og bætti við að hann hefði alltaf verið talsmaður þess að skera eigi niður ,,flottræfilsháttinn."

Ólafur sagði í bókun í borgarstjórn fyrr í vikunni að forgangsröðun í þágu velferðarþjónustu og starfsemi borgarinnar hafa mætt litlum skilningi borgarfulltrúa annarra flokka þar til nú. ,,Loks skal bent á að núverandi meirihluti hóf sitt samstarf með því að fresta borgarráðsfundi vegna ferðalaga helstu lykilmanna í borgarráði. Nú fyrst er verið að snúa við blaðinu og því ber að fagna. Ég segi því loksins, loksins."